الأول أهلا و سهلا بكل الزوار
دي تجربة جديدة أول مرة أعمل مدونة أعرضها بابلك و إن شاء الله هتنتشر بشكل سريع زي ما بتمنى
بداية أنا بعشق علوم كتير جدا من ضمنها علم النفس الخاص بتحليل الشخصيات
أصل النفس البشرية ربنا خلقها بنظام زي ما خلق كل حاجة في الكون دا بنظام
و كل إنسان لو أطلق العنان لخياله و قال للمنطق استوب ، أنا لازم أتخيل إن كل حاجة ممكنة .. لازم أكون مرن .. تفكيري لازم يكون مرن و منفتح هيقدر يعرف بواطن شخصيات الناس من حواليه و بالتالي مش هنلاقيه في يوم قاعد مصدوم من صاحبه .. من حبيبه .. من جاره .. من شريكه ؛ لأنه خلاص عرف شخصيته من البداية و كان عارف اللي قدامه دا آخره إيه .. ممكن يعمل إيه؟ هيخون؟ هيسرق؟ هيكدب؟ هيعرف مميزات شخصية اللي قدامه وعيوبها
ازاي؟ هو دا السؤال
الإجابة : احنا كبشر بننقسم لجماعات رئيسية من ناحية الحواس
1- السمعيين
2- البصريين
3- المعتمدين على حاسة الشم
4- المعتمدين على التلامس الجسدي
5- المعتمدين على الحاسة اللي جواهم.
السمعيين مش بيحتاجوا إنهم يشوفوا الشخصية قدامهم عشان يحبوها أو يكرهوها أو يتعرفوا على ملامحها السلبية و الإيجابية
دول اللي بينطبق عليهم : و الأذن تعشق قبل العين أحيانا
البصريين مش بيقدروا يكونوا أي رأي إلا فيس تو فيس
دول بقى اللي بيعشقوا من النظرة الأولى
المعتمدين على حاسة الشم : من البرفان - رائحة المكان - رائحة الأكل بيعرفوا كل حاجة تهمهم
زي الأعمى كدا
المعتمدين على التلامس الجسدي : بيوضح حبهم أو كرههم من ملامستهم للي قدامهم .. الملامسة هنا بقصد بيها : الهزار - الحضن - السلام بالإيد أو بالبوس على الخد
بمجرد ما بيلمسوا اللي قدامهم بتلاقيهم ارتاحوا أو اتضايقوا .
المعتمدين بقى على الحاسة السادسة اللي بتكون داخلهم دول معظمهم بيكونوا بنات - ستات لأن تركيبة المخ عندنا عكس تركيبة الرجال .. احنا بنفكر بالفص الأيمن و الأيسر مع بعض. و بالشكل دا بنترجم بسهولة حركات الجسم مع نظرة العين مع نبرة الصوت مش الكلام نفسه لا النبرة
كل دا بنترجمه في أقل من الثانية و بناء على نتيجة ترجمتنا المخ بيدينا إحساس بإن الشخص دا كويس.. أو الشخص دا غير مرغوب فيه ، كتير أوي بيفتكروا دا هلوسة أو رفض أو قبول من غير مبرر و بيقولوا ندي اللي قدامنا فرصة ؛ ودي أكبر غلطة لأن الإحساس الأولاني نادرا ما يخطيء.
كفاية كده النهاردة
17-7-2013
8-9-1434
الأربعاء
الاول مبروك عالمدونة يا بطة
ردحذفثانيا ممكن يفيدك فى بحثك ان لاقيت مثلا اكتر من حاسة من دول ممكن تحركنى يعنى على حسب الموقف بس بالاغلب انا سمعية
الله يبارك فيكي يا حبيبتي
حذفآه أكيد الحواس الباقية مش ملغية لكن الغالب على كل إنسان بيكون حاجة واحدة ياقمر
نورتيني بجد